կառնուտի միջնակարգ դպրոցի մասին

ՀՀ Շիրակի մարզի Կառնուտի միջնակարգ դպրոցը հիմնադրվել է 1904թ.՝  որպես եռամյա ծխական դպրոց: 1930-1962թթ. գործել է որպես յոթնամյա, իսկ 1963-1987թթ.՝ ութնամյա: 1988-1989 ուստարվանից մինչև օրս այն միջնակարգ է: Կառնուտի միջնակարգ դպրոցը 1988 թվականի  դեկտեմբերի 7-ի ավերիչ երկրաշարժի հետևանքով քանդվել է, որի պատճառով ուսումնական պարապմունքները մինչև 2002 թվականի սեպտեմբեր անցկացվել են տնակային դպրոցում: 2002 թվականի սեպտեմբերի 1-ին  շահագործման հանձնվեց նոր երկհարկանի շենքը, որտեղ մինչև այսօր իրականացվում են ուսումնական պարապմունքները: Դպրոցի ներկայիս շինությունը մի քանի անգամ անցել է վերանորոգում՝ 2014թ, 2018թ.: 2015 թվականին «Հայաստանի պատանեկան նվաճումներ» ՀԿ-ի հատկացրած դրամաշնորհի և համագյուղացիների ու ուսուցչական հանրույթի ֆինանսական աջակցությամբ բարեկարգվեց դպրոցի բակը:

  2025 թվականին Կառնուտի միջնակարգ դպրոցն ՀՀ Կառավարության 2093-Ն որոշմամբ ընդգրկվել է  «Մինչև 2026 թվականը կառուցվող, հիմնանորոգվող կամ վերակառուցվող  300 դպրոցներ»  ծրագրում, որի արդյուքում դպրոցն ամբողջությամբ հիմնանորոգվել է, բակում կառուցվել է բացօթյա մարզահրապարակ պահանջվող բոլոր չափանիշներին համապատասխան:  Դպրոցի գույքն ամբողջությամբ փոխարինվել է նորով, վերազինվել են քիմիայի, կենսաբանության, ֆիզիկայի և ԹԳՀԳ լաբորատորիաները, նոր սարքավորումներով է վերազինվել ճաշարանը և խոհանոցը: Դպրոցի բակում գործում է «Սմարթ» ընթերցասրահը, որի մի հատված տրամադրվել է «Արմաթ»  լաբորատորիային: Դպրոցն իրականացնում է եռաստիճան կրթական ծրագրեր՝ տարրական, հիմնական և միջնակարգ: